മുസ്ലിം സമൂഹം നിരന്തരം തെറ്റിദ്ധരിക്കപ്പെടുന്നു

Wednesday, December 23, 2009
കോഴിക്കോട്: മുസ്ലിം സമൂഹവും ഇസ്ലാമും എല്ലാ രംഗത്തും നിരന്തരം തെറ്റിദ്ധരിപ്പിക്കപ്പെട്ടുകൊണ്ടിരിക്കുകയാണെന്ന് ഡോ. ശൈഖ് ഖല്‍ഫാന്‍ അല്‍ ഇസ്രി (ഒമാന്‍) പറഞ്ഞു. ഈ സാഹചര്യത്തില്‍ കാലഘട്ടത്തിന്റെ ഉത്തരവാദിത്തം ഏറ്റെടുത്ത് രാഷ്ട്രത്തിനും സമൂഹത്തിനും നന്മ വിതറി ഇസ്ലാമിന്റെ യഥാര്‍ഥ ചിത്രം സമൂഹത്തെ ബോധ്യപ്പെടുത്താന്‍ കര്‍മരംഗത്തിറങ്ങണമെന്നും അദ്ദേഹം ഉദ്ബോധിപ്പിച്ചു. ഒറ്റപ്പെടാതിരിക്കുക എന്ന പ്രമേയവുമായി ജില്ലാ മുസ്ലിം യൂത്ത്ലീഗ് സംഘടിപ്പിച്ച യൂത്ത്മീറ്റ് സ്വപ്നനഗരിയില്‍ ഉദ്ഘാടനം ചെയ്യുകയായിരുന്നു അദ്ദേഹം. ലീഗ് സംസ്ഥാന സെക്രട്ടറി ടി.എ. അഹമ്മദ്കബീര്‍ മുഖ്യപ്രഭാഷണം നടത്തി. തീവ്രവാദ ഭീകരവാദ പ്രവര്‍ത്തനങ്ങള്‍ക്കെതിരെ പ്രതിരോധം തീര്‍ക്കാന്‍ മുസ്ലിം യുവത രംഗത്തിറങ്ങണം. യുവത്വം രാഷ്ട്രത്തിന്റെ പുരോഗതിക്കും നശീകരണത്തിനും ഉപയോഗപ്പെടുത്താവുന്നതാണ്. അത് സമൂഹത്തിന്റെയും രാഷ്ട്രത്തിന്റെയും നന്മക്കായി ഉപയോഗപ്പെടുത്തി രാഷ്ട്ര പുനര്‍നിര്‍മാണപ്രക്രിയില്‍ പങ്കാളികളാവണമെന്നും അദ്ദേഹം പറഞ്ഞു. നമ്മുടെ ഓരോ ചലനങ്ങളും ഇസ്ലാമികമായിരിക്കണം. നാം സ്വാധീനിക്കപ്പെടേണ്ടവരല്ല, മറ്റുള്ളവര്‍ നമ്മളാല്‍ സ്വാധീനിക്കപ്പെടേണ്ടവരാണ്. ചരിത്രത്തോടൊപ്പം മുന്നോട്ടുപോകാന്‍ നാം തയാറാകണം. ചരിത്രത്തിന്റെ ചവറ്റുകൊട്ടയില്‍ ഇടം നേടുന്നവരാവരുത് ^ഖല്‍ഫാന്‍ പ്രസ്താവിച്ചു. യൂത്ത്ലീഗ് ജില്ലാ പ്രസിഡന്റ് സി.പി.എ. അസീസ് അധ്യക്ഷത വഹിച്ചു. പി.കെ.കെ ബാവ, എം.കെ. രാഘവന്‍ എം.പി, ടി.പി.എം സാഹിര്‍, അഡ്വ. എന്‍. ഷംസുദ്ദീന്‍, അഷ്റഫ് കടക്കല്‍, അഹമ്മദ്കുട്ടി ഉണ്ണികുളം, ടി.ടി. ഇസ്മാഈല്‍, പി.കെ. ഫിറോസ്, ഡോ. പുത്തൂര്‍ റഹ്മാന്‍, സി.കെ.വി. യൂസുഫ് എന്നിവര്‍ സംസാരിച്ചു. കെ.ടി. അബ്ദുറഹ്മാന്‍ സ്വാഗതവും നജീബ് കാന്തപുരം നന്ദിയും പറഞ്ഞു.
madhyamam