ഇന്ന് അടിയന്തര മന്ത്രിസഭാ യോഗം; റിപ്പോര്‍ട്ട് ഉടന്‍ പാര്‍ലമെന്റില്‍

Tuesday, November 24, 2009
ന്യൂദല്‍ഹി: അടിയന്തര കേന്ദ്ര മന്ത്രിസഭാ യോഗം ഇന്ന്. പ്രധാനമന്ത്രി ഡോ. മന്‍മോഹന്‍ സിങ്ങിന്റെ അസാന്നിധ്യത്തില്‍ ധനമന്ത്രി പ്രണബ് കുമാര്‍ മുഖര്‍ജിയുടെ അധ്യക്ഷതയിലാകും രാവിലെ യോഗം ചേരുക. ലിബര്‍ഹാന്‍ കമീഷന്‍ റിപ്പോര്‍ട്ട് ചോര്‍ന്ന സാഹചര്യത്തില്‍ നടപടി റിപ്പോര്‍ട്ടിന് കൂടി അംഗീകാരം നല്‍കി രണ്ടും എത്രയും പെട്ടെന്ന് സഭക്കു മുമ്പാകെ കൊണ്ടുവരാനാണ് നീക്കം. രാവിലെ ഒമ്പതിന് ചേരുന്ന മന്ത്രിസഭാ യോഗം റിപ്പോര്‍ട്ട് സമര്‍പ്പണം സംബന്ധിച്ച് അന്തിമ തീരുമാനം കൈക്കൊള്ളും.

റിപ്പോര്‍ട്ട് നടപ്പു സമ്മേളനത്തില്‍ തന്നെ സഭയില്‍ സമര്‍പ്പിക്കുമെന്ന മന്ത്രി ചിദംബരത്തിന്റെ വിശദീകരണത്തില്‍ പ്രതിപക്ഷം ഇന്നലെ തൃപ്തരായിരുന്നില്ല. ഈ ആവശ്യം ഉന്നയിച്ച് സഭാ നടപടികള്‍ വീണ്ടും തടസപ്പെടുത്താനാണ് പ്രധാന പ്രതിപക്ഷ പാര്‍ട്ടികളുടെ തീരുമാനം. ഈ സാഹചര്യത്തില്‍ കഴിയുന്നത്ര വേഗം റിപ്പോര്‍ട്ട് സഭക്കു മുമ്പാകെ സമര്‍പ്പിക്കുകയാകും നല്ലതെന്ന വിലയിരുത്തലാണ് ഇന്നലെ രാത്രി സോണിയാ ഗാന്ധിയുടെ വസതിയില്‍ ചേര്‍ന്ന അടിയന്തര കോര്‍ കമ്മിറ്റി യോഗത്തില്‍ ഉരുത്തിരിഞ്ഞത്. കേന്ദ്ര മന്ത്രിമാരായ പ്രണബ് കുമാര്‍ മുഖര്‍ജി, പി. ചിദംബരം, ഏ.കെ ആന്റണി, വീരപ്പ മൊയ്ലി എന്നിവരാണ് യോഗത്തില്‍ പങ്കെടുത്തത്.
ആഭ്യന്തര മന്ത്രാലയത്തില്‍ നിന്നാണ് റിപ്പോര്‍ട്ട് ചോര്‍ന്നതെന്ന സംശയം ബലപ്പെട്ടിരിക്കെ,ഇക്കാര്യത്തില്‍ പ്രതിപക്ഷത്തിന്റെ ആവശ്യം നീട്ടിക്കൊണ്ടു പോകുന്നത് ദോഷം ചെയ്യുമെന്ന വിലയിരുത്തലാണ് പൊതുവെ ഉണ്ടായതെന്നറിയുന്നു.

കമീഷന്‍ റിപ്പോര്‍ട്ടിന്‍മേല്‍ കൈക്കൊണ്ട നടപടികള്‍ സംബന്ധിച്ച റിപ്പോര്‍ട്ടും സഭയില്‍ വെക്കണമെന്നതിനാലാണ് മന്ത്രിസഭാ യോഗം അനിവാര്യമായിത്തീര്‍ന്നത്. ഇതുവരെ കൈക്കൊണ്ട നടപടികള്‍ കൂടി ഉള്‍പ്പെടുത്തിയാകും കമീഷന്‍ റിപ്പോര്‍ട്ട് സഭയില്‍ വെക്കുക. മിക്കവാറും ഇന്നു തന്നെ റിപ്പോര്‍ട്ടും നടപടി റിപ്പോര്‍ട്ടും സഭയില്‍ വെച്ചേക്കുമെന്നും സൂചനയുണ്ട്.
മാധ്യമം